گَلہ ۔۔

سری لنکا کی حکومت نے بالآخر اپنے ملک میں تین دہائیوں سے جاری خانہ جنگی ختم کر ہی ڈالی۔
اس بارے میں آراء مختلف ہیں کہ یہ کام انھوں نے کیسے سرانجام دیا ، مگر یہ بات تو روز روشن کی طرح عیاں ہے کہ اگر ارادہ مصمم ہو، نیت صاف ہو تو کوئی کام بھی ناممکن نہیں۔
میری دلی خواہش ہے کہ ہمارے ملک کے مختلف حصوں میں جاری شورش بھی ختم ہو جائے، ہم بھی کسی دن فخر سے کہہ سکیں کہ ہم ایک ٓزاد ملک کے خوش باش شہری ہیں، مگر انجانے مفادات اس راہ میں رکاوٹ ہیں۔
کراچی دہشت کے ہاتھوں یرغمال ہے تو بلوچستان میں علیحدگی کا شور و غوغا ہے۔
وزیرستان کے اسلام پسند اپنی اسلام پسندی کے شوق میں ملک کی جڑیں کھود رہے ہیں تو سوات اور مالاکنڈ میں نادان لوگ دشمنوں کے ہاتھوں کھیل کر ملک کو نقصان پہنچا رہے ہیں۔
ہمارے قائدین؟
ہمارے قائدین میں سے تو کچھ خود ساختہ جلا وطنی کے سلسے میں ملک سے باہر مزے کر رہے ہیں۔ ان کے پیروکار کہتے ہیں کہ یہاں ان کی زندگی کو خطرہ ہے۔ یہ ملک ان کی زندگی کی ضمانت نہیں دے سکتا مگر وہ اس ملک کو بچانے کی بات کرتے ہیں۔
انبیاء کے وارث پجیرو اور پراڈو گاڑیوں کے سکینڈل میں ملوث ہوتے جا رہے ہیں۔ ڈیزل اور سرکاری زمین پر قبضہ تو خیر بڑی بات ہے۔
کچھ لوگ دبئی میں اپنے بینک اکاؤنٹ اور کاروبار کے سلسلے میں مفکر رہتے ہیں تو کچھ نے سعودیہ اور کینیا میں شوگر ملیں بنا لی ہیں۔ مانتا ہوں کہ یہ کاروبار ان کا ذاتی طور پر قائم کیا ہوا ہے، مانتا ہوں کہ انھوں نے اس کے قیام میں محنت کی ہوگی، مگر یہ سب لوگ، سب لوگ جن کا میں نے ذکر کیا ہے، پاکستانی ہیں۔ اس ملک نے کچھ دیا ہے انھیں، اور اب وہ لوٹانے کا وقت آگیا ہے۔
مجھے ایک بھی ایسا قائد نظر نہیں آ رہا جو ہماری قیادت کر سکے، بھیڑوں کے اس گلے کو بحفاظت باڑے تک پہنچا دے۔ ورنہ یہ نگہبان اس گلے کو ایسے قافلے کے ہاتھ بیچ دیں گے جو کسی عزیز مصر کی سرزمین کو نہیں جاتا۔۔۔۔