لاؤڈ سپیکر بھی ایسا ہی ایک مسئلہ ہے۔

اگر مجھ سے ہمارے معاشرے کی سب سے نقصان دہ چیز کے بارے میں پوچھا جائے تومجھے جواب دینے میں کوئی تأمل نہ ہوگا۔

آپ جانتے ہیں ہمارے معاشرے میں اس وقت بہت سی چیزیں ایسی ہیں کہ ان کی  نشان دہی کر کےاُن کو بآسانی اس زمرے میں لایا جا سکتا ہے، مگر ایک واحد چیز جو بذات خود کچھ نہ کرسکنے کے باجود خون کی ندیاں بہا دیتی ہے ،  اکثر نظر انداز ہو جاتی ہے۔

جی ہاں، میرا اشارہ لاؤڈ سپیکر کی جانب ہے، وہی لاؤڈ سپیکر  جسے استعمال کر کے ہمارے آتش بیان مقرر حضرات کشتوں کے پشتے لگا دیتے ہیں،  اپنوں کی تعریف میں غُلو کی تمام حدیں پار کر جاتے ہیں اور حریف کو تحت الثریٰ میں جا بٹھاتے ہیں۔

یہ حقیقت ہے کہ اگر اس چیز کو آپ کی زندگی سے نکال دیا جائے تو شائد آپ کو شک ہونے لگے کہ آپ  بر صغیر  سے  نکل کر کہیں اور آ بسے ہیں۔  شہری زندگی کی مصروفیت، مسابقتی زندگی کی ہلچل اور اپنا معیار زندگی قائم رکھنے کی دوڑ میں انسان بہت کچھ بھول جاتا ہے، اور اگر یہ لاؤڈ سپیکر نہ ہوں تو آپ کو کیسے علم ہوگا کہ آج شب برأت ہے، شب معراج ہے یا کوئی اور موقع جس پر انسان ایک دو خاص عمل کر کے سارے سال کی لازمی عبادات سے چھٹکارا پا سکتا ہے۔

اس آخری جملے سے آپ متفق ہوں نہ ہوں، مگر یہ حقیقت ہے کہ شارٹ کٹ اپنانے کی عادت نے ہمیں دین کے معاملے میں بھی شارٹ کٹ ڈھونڈنے پر مجبور کر دیا ہے۔ مذہب برصغیر کے مسلمان کی زندگی کا جزو لا ینفک ہے۔ یہ مسلمان عام زندگی میں جیسابھی ہو، مگر مذہبی معاملوں میں خطرناک حد تک جذباتی ہو جاتا ہے۔اس جذباتیت میں یہ مسلمان خون بہانے سے بھی گریز نہیں کرتا۔ اس لئے بہت سے معاملے جن میں آسانی سے بات چیت کے ذریعے سے کوئی حل نکالا جاسکتا ہے، محض اس جذباتیت کی وجہ حل نہیں ہو پاتے اور مسلسل ایک معاشرتی تناؤ کا باعث بنے رہتے ہیں۔

لاؤڈ سپیکر بھی ایسا ہی ایک مسئلہ ہے۔

اب آپ شائد کہیں کہ یہ کیا بات ہوئی، میں شائد صیہونی مفادات کے تحت کام کر رہا ہوں، یا میں اسرائیلی ایجنٹ ہوں جو کہ اسلام کی شناخت کوتباہ کرنے کے درپے ہوں وغیرہ وغیرہ۔۔ مگر حقیقت یہ ہے کہ لاؤڈ سپیکر کے حامی حضرات تقریبا یہی دلائل دیتے ہوئے نظر آتے ہیں۔

بڑے شہروں میں رہنے والے میرے قارئین اس بات سے اتفاق کریں گے کہ سال کے کچھ مہینوں میں بالخصوص اور کچھ مسالک کی مسجدوں میں تو تقریبا پورے سال ہی اذان کے علاوہ بھی لاؤڈ سپیکر کا استعمال کیا جاتا ہے۔ یہ استعمال وہ لوگ بڑے شوق سے کرتے ہیں جو خود کو قاری عبدالباسط الصمد، قاری صداقت علی، خورشید احمد نعت خواں یا کچھ اور سمجھتے ہیں اور ان کا خیال ہے کہ اہل محلہ  ان کی آواز سننے کے لئے تڑپ رہے ہیں اور اگر ایک ناغہ بھی ہوگیا تو شائد ناقابل تلافی نقصان ہو۔ غالبا اتوار کے دن کے علاوہ، ہفتے کے تمام دن فجر کی نماز کے بعد یہ ترتیب چلتی ہے۔

اب آپ ہمارے محلے کی مثال لے لیجئے۔ ایک صاحب، اپنی طرف سے پوری کوشش کرتے ہیں کہ وہ قصیدہ بردہ شریف کے چند جملے اسی خوش الحانی سے پڑھیں جیسے کہ اسے گایا گیا ہے، مگر شائد ان کے گلے میں کوئی خرابی ہے، ان کی آوازہی بہت بھونڈی ہے۔ سُر ڈھونڈنا تو دور کی بات۔ مگر مجال ہے یہ صاحب اپنی روٹین سے ہٹیں۔ اگر ان کے مقررہ وقت پر بجلی نہ ہو تو یہ بجلی کے آنے کے بعد مسجدتو تشریف لائیں گے، مگر ناغہ نہیں کریں گے۔ ایک اور صاحب نے ان کی مسابقت کی کوشش کی اور تلاوت قرآن عین اسی وقت شروع کی جب ان کے قصیدہ پڑھنے کا وقت تھا، کچھ دن تو ہمیں دہری اذیت برداشت کرنی پڑی، مگر قصیدہ والے صاحب کی جیت ہوئی ہے اور اب وہی  بلا شرکت غیرے صبح صبح ثواب کماتے نظر آتے ہیں۔

کچھ مساجد میں نماز کے بعد با جماعت لاؤڈ سپیکر پرکلمہ توحید  پڑھا جاتا ہے۔  کچھ میں جمعہ کی نماز کے بعد مولانا احمد رضا خان صاحب کی مشہور زمانہ نعت پڑھی جاتی ہے۔ کچھ مؤحدین حضرات کسی ناظر کی تقریر کی آڈیو کیسٹ لگا کر مائکروفون کے سامنے رکھ جاتے ہیں، کچھ لوگ اپنی مساجد میں، تبلیغی بیانات کی کیسٹیں لگا جاتے ہیں۔ غرض یہ کہ کوئی بھی اس بیماری سے بچا ہوا نظر نہیں آتا۔

ماہ رمضان  میں تو حالت اور بری ہو جاتی ہے۔ بڑے شہروں میں ، جیسا کہ میرا تجربہ ہے، سحری سے دو یا تین گھنٹے پہلے ہی محلے کے لڑکے لاؤڈ سپیکر  پرقبضہ جما لیتے ہیں، روزے دارو اٹھو جیسے بیانات سے لے کر سائرن بجانے  تک ہر قسم کی وہ حرکت کی جاتی ہے جس سے کسی کے آرام سے بیٹھنے کا اندیشہ بھی باقی نہ رہے۔ایک صاحب کی تو اتنی بھیانک آواز تھی کہ میں تو نیند میں ہی ڈر گیا۔  مگر مجال ہے کہ کوئی بھی اس پر اعتراض کرے؟

ہم لوگ تکلیف برداشت کر تو لیتے ہیں ، مگر آواز بلند نہیں کرتے ۔۔ میں نے آج تک بہت کم لوگوں کو اس ایذا رسانی پر احتجاج کرتے ہوئے دیکھا ہے۔۔ رمضان کے آخری عشرے میں صورت حال اور بگڑ جاتی ہے، ساری ساری رات لاؤڈ سپیکر کھلے رہتے ہیں، لوگوں کو اذیت پہنچائی جاتی ہے اور ہم، ہم بھلے مانس لوگ محض اس وجہ سے اس پر احتجاج نہیں کرتے کہ شائد گناہ کے مرتکب نہ ہوجائیں۔  اس اذیت سے انسانی صحت کو جو نقصان ہوتا ہے اس کی جھلک اس مضمون میں دیکھیں۔

حکومت پاکستان نے لاؤڈ سپیکر کے اس بے جا استعمال پر پابندی تو لگائی ہوئی ہے ، مگر ہمارے اہل جبہ و دستار جس طرح کھلے عام اس پابندی کا مذاق  اڑا رہے ہیں اس سے مجھے قرآن کی کچھ آیات یاد آتی  ہیں۔ مجھےیاد ہے  جب بہت سال پہلے لاؤڈ سپیکر پر پابندی کا قانون نافذ کیا گیا تو ہمارے اہل جبہ و دستار نے اس کی یہ کہہ کر مخالفت کی کہ یہ شعائر اسلام میں مداخلت کے مترادف ہے اور یہ کہ ہماری حکومت یہودیوں  کے ایجنڈے پہ عمل کر رہی ہے کہ اسلام کو مسلمان کی زندگی سے نکال دیا جائے۔ یہ ایسی بات تھی جس پہ تمام مسالک کے علما ء متفق تھے۔ ہے نا مزے کی بات۔ بالکل اسی طرح جب مساجد سے پانی اور بجلی کا ٹیکس یا بل لینے کی بات کی جاتی ہے تو یہ لوگ متحد ہو جاتے ہیں۔

مجھے سمجھ نہیں آتی اذان  اور خطبہ جمعہ کے علاوہ لاؤڈ سپیکر کے استعمال  پر پابندی سےہمارے اسلام میں کون سی کمی رہ جائے گی۔

نبی اکرم ﷺسے منقول ہے کہ مسلمان وہ ہے جس کے ہاتھ اور زبان سے دوسرے مسلمان محفوظ رہیں۔