سُنی اتحاد کونسل

آج صبح اخبار میں پڑھا کہ بریلوی مکتبہ فکر سے تعلق رکھنے والی آٹھ جماعتوں نے سُنی اتحاد کونسل کے نام سے ایک مشترکہ تنظیم یا پلیٹ فارم بنا لیا ہے جس کے تحت ملک میں طالبا ن کے بڑھنے ہوئے اثر کے خلاف جدوجہد کی جا ئے گی۔
اگر منطقی انداز سے دیکھا جائے تو اس میں کوئی برائی نظر نہیں آتی۔ طالبان کا مسئلہ اس وقت تر جیحی طور پر حل کرنا چاہئے۔ سوات ، بونیر، مالاکنڈ اور دوسرے علاقوں سے لاکھوں کی تعداد میں لوگوں نے نقل مکانی شروع کر دی ہے۔ باجوڑ سے تعلق رکھنے والے بہت سے مہاجرین پہلے سے ہی پشاور اور نوشہرہ کے کیمپوں میں پڑے ہوئے ہیں۔ حالات کی نزاکت کے باوجود طالبان کی قیادت کو اس کا ادراک نہیں اور وہ مسلسل ایسے اقدامات اٹھائے جا رہی ہے کہ جس کے نتیجے میں اور خرابی پیدا ہو رہی ہے۔ ان کے بیانات اور زیادہ خوف پیدا کر رہے ہیں۔
ملک میں طالبان کے لئے رائے عامہ مختلف آراء میں بٹی نظر آ رہی ہے۔ کچھ لوگ انھیں ظالمان کے نام سےسے پکارتے ہیں اور کچھ لوگ سمجھتے ہیں کہ طالبان کے روپ میں غیر ملکی ایجنٹ ملک میں خوف و ہراس پھیلا رہے ہیں۔ وہ یہ سوال بھی اُٹھاتے ہیں کہ اگر یہ غیر ملکی ایجنٹ نہیں ہیں تو چہرہ کیوں چھپاتے ہیں؟
ان سب باتوں سے بالکل مختلف ، کچھ لوگ اس بات کے قائل ہیں کہ طالبان اور آرمی ایک ہی سکے کے دو رُخ ہیں۔ اِن لوگوں کے اپنے دلائل ہیں۔ ان سب باتوں سے قطع نظر، یہ بات تو مسلم ہے کہ اب طالبان اب مصلحین سے بڑھ کر مفسدین کا روپ اختیار کرتے چلے جا رہے ہیں۔ ان کی اولیں نیت خواہ کچھ بھی رہی ہو، مگر اب ان کا ہر قدم فساد ہی پیدا کر رہا ہے۔
گو کہ یہ لوگ بھی کلمہ گو مسلمان ہیں ، مگر اس فتنے سے لڑنے کے لئے ہر ممکن قدم اُٹھانے کی ضرورت ہے، خواہ اس کے لئے ہتھیار ہی کیوں نہ اُٹھانے پڑیں۔ مگر جنگ و جدل آخری قدم ہونا چاہئے۔ اس نازک مرحلے پر پوری قوم کو یکجا ہو کر اس فتنے کا سامنا کرنا چاہئے اور میں سمجھتا ہوں کہ اس موڑ پر مسلکی اختلافات اجاگر کرنا اتنا ہی خطرناک ہے جتنا کہ طالبان کا نقطہ نظر۔
طالبان کا اپنا ایک نظریہ ہے۔ یہ نظریہ باقی سب لوگوں کے اسلام کے نظریہ سے متصادم ہے خصوصا بریلوی مکتبہ فکر سے تو بالکل متضاد۔ مزاروں کے معاملے میں ان دونوں مسالک کی رائے کا موازنہ کر لیجئے۔ کچھ لوگ اسے وہابی اسلام کہتے ہیں اور کچھ پشتون اسلام۔ وہ اسلام کے نفاذ کے بارے میں خود بھی شکوک و شبہات کا شکار ہیں، جیسا کہ مجھےمولانا صوفی محمد کے سلیم صافی کو دیئے گئے انٹرویو سے لگا۔ بات بات پر پینترا بدلنے والا ایک شخص کسی انداز سے بھی ایک قائد نظر نہیں آ رہا تھا۔
اب اگر اس موقع پر دوسرے مسالک اپنے طور پر ایک تنظیم یا اتحاد بناتے ہیں جس میں کسی اور مسلک کی نمائندگی نہیں ہوتی تو مجھے ڈر ہے کہ مسالک کے درمیان کی خلیج اور چوڑی ہوجائے گی۔ اور مسئلہ سلجھنے کی بجائے اور الجھ جائے گا۔