زبان ِ یار ِ من رُوسی ، و من روسی کچھ کچھ دانم

ہماری ضدی طبیعت نے یہ دن بھی دکھانا تھا۔۔

 

پچھلے ہفتے راولپنڈی جانا ہوا، تو سوچا ، انٹرنیٹ سے اتنا کچھ اُتارا ہوا ہے، وہی دورانِ سفر سُن لیا جائے۔ نظر انتخاب ایک فولڈر پر پڑی جو کافی عرصے سے کھولا نہیں تھا۔ اب کے سوچا ،دیکھیں شائد اس میں کچھ

کام کی چیز ہو۔۔۔ کھولا تو پتہ چلا اس میں روسی زبان کے سیکھنے کی سی ڈیاں ہیں۔

یہ آٹھ سی ڈیاں ایک دوست کی معرفات اتاری تھیں ایک برس قبل۔ وجہ یہ تھی کہ ایک رفیق کار نے ، جو کہ روس یا یوکرائن سے فارغ التحصیل تھا، ہمیں روسی زبان سکھانے میں دلچسپی نہیں دکھائی تھی۔ طبیعت چونکہ ضدی سی ہے، اور پھر ہر وہ کام ضرور کرنا ہے جس سے روٹین کے کاموں سے توجہ ہٹے، لہذا روسی زبان کی طرف متوجہ ہونا ایک لازمی امر تھا۔

ڈاؤنلوڈ کے بعد اس فولڈر کی شکل تک نہ دیکھی تھی، چُنانچہ سوچا کیوں نہ اسے ٹیسٹ کر لیا جائے۔ پسند آیا تو ٹھیک، نہ آیا تو ڈیلیٹ کرنا کیا مشکل ہے۔

تو جناب، کچھ گانوں کے ساتھ پہلی دو سی ڈیوں کو بھی نوکیا موبائل میں ڈال لیا اور چل پڑے۔
جب سننا شروع کیا تو پروگرام اتنا اچھا تھا کہ پنڈی تک پہنچتے پہنچتے ایک سی ڈی دو مرتبہ سن لی تھی، اور واپسی پر دوسری سی ڈی بھی۔

گانے نہ سننے کا قلق رہے گا البتہ۔۔

پروگرام اس طرح بنایا گیا ہے کہ یہ ایک استاد یا استانی اور اس کے دو شاگردوں کے درمیان کی گئی گفتگو ہے جو ریکارڈ کی گئی ہے۔ اس گفتگو میں بہت اچھے طریقے سے دونوں شاگردوں کوروسی زبان بولنا سکھائی گئی ہےْ
ان جملوں کو خود بھی دُہرانا پڑتا ہے، تا کہ ذہن نشین ہو جائیں۔ اب ایسا ہوا کہ ہم با آواز بلند تو گاڑی میں دہرا نہ سکتے تھے، اس لئیے سرگوشی میں دہراتے رہے۔ ہماری دائیں جانب جو جوان بیٹھا ہوا تھا، پہلے تو سمجھا کہ صُوفی صاحب کوئی لیکچر سن رہے ہیں۔ پھر بہانے سے ہم سے ٹکرایا کہ کہیں گانا نہ ہو، مگر جب اس نے انگریزی زبان سنی وہ بھی بغیر میوزک کے، تو خاموش ہو گیا۔ اب کیا ہوا کہ جب ہم سرگوشی میں یا، ایسے ہی روسی زبان کا کوئی جملہ حسب ہدایت دہراتے تو وہ ہماری طرف دیکھتا۔ مگر تھرکنا ندارد پا کرکچھ کہ نہ پاتا۔ جب ہم سنگ جانی پہنچے تو اسے یقین ہو چلا تھا کہ یہ صُوفی واقعی پاگل ہے۔۔۔ کیوں کہ ایک مشکل اور لمبا جُملہ ، ریکارڈڈ شاگردوں سے پہلے ہم بنا چکے تھے، اور اسی خوشی میں ہم نے ایک مُکا ہوا میں لہرایا تھا جو کہ ہائ ایس کی چھت پہ لگا۔۔۔۔ ہا ہا ہا

خیر، واپسی پہ تو یہ حرکت نہ کی، مگر حقیقی خوشی اس وقت ہوئی جب اگلے ہی دن ایک اور دوست کے فون سے ہم نے اِ س دوست سے فونیٹک انگلش کی مدد سے روسی زبان میں بات چیت شروع کی۔۔ اور اب ہمیں سی ڈی کے ساتھ ساتھ ایک زندہ اُستاد کی شاگردی بھی حاصل ہو گئی ہے۔۔

آ ج ہی استاد جی نے کہا ، کہ ہماری رفتار اچھی ہے، گو کہ ہم ابھی تک پہلی دو سی ڈیوں میں ہی پھنسے ہوے ہیں۔ دُعا کیجئے کہ جلد ہی باقی چھے سی ڈیاں ختم ہو جائیں۔