ذہنی سکون

آج ہسپتال سے واپسی پر جب میں کھانا کھا کر آرام کی غرض سے لیٹا ، تو ابھی آنکھ لگی ہی تھی کہ ایک ایس ایم ایس کی ٹون نے چونکا دیا۔
اس خیال سے کہ شائد کسی دوست کو کوئی ضروری کام ہوگا، میں نے ایس ایم ایس پڑھا تو ایک انجانے نمبر سے یہ ایس ایم ایس وصول ہوا تھا۔ خیر ایس ایم ایس پڑھا تو ایک بے ضرر سا ایس ایم ایس تھا جس کا لُبِ لباب یہ تھا کہ ہر حال میں اللہ سےبہتری کی امید رکھنی چاہئے ۔
بہر حال شام کو میں نے ایس ایم ایس بھیجنے والے سے درخواست کی کہ وہ اپنی شناخت کروادیں کیونکہ یہ نمبر میرے پاس نہیں ، او ر ہو سکتا ہے ان کا کوئی پرانا نمبر میرے پاس محفوظ ہو۔
مجھے بتایا گیا کہ” میں ایبٹ آباد سے طارق ہوں”۔
میں نے پھر پوچھا کہ ، کونسا طارق؟ میں شناخت کرنے میں ناکام ہوگیا ہوں۔ تو موصوف نے بتایا کہ، ” در اصل میں مختلف معلوم اور نا معلوم نمبروں پر مذہبی ایس ایم ایس بھیج کر ذہنی سکون حاصل کرتا ہوں۔”
میں نے اس شخص کے اس جذبے کو سراہتے ہوئے درخواست کی، کہ چونکہ میں اسے جانتا نہیں ، اس لئے میں مستقبل میں اس کی طرف سے ایسے ایس ایم ایس بالخصوص اور ہر قسم کے ایس ایم ایس بالعموم وصول نہیں کرنا چاہتا۔ لہذا مجھے دوبارہ تنگ نہیں کیا جائے۔
اس نے شرافت سے میری بات مان لی۔ اور میں خوش ہوگیا کہ میری جان اتنی جلدی چُھوٹ گئی۔ مگر تھوڑی دیر بعد ہی ایک اور ایس ایم ایس بھیج دیا گیا۔ اب کی بار میں نے اسے فون کرنے کی کوشش کی مگر اس نے کال وصول نہیں کی تو میں نے ایک میسج میں صرف اتنا کہا کہ ” لگتا ہے آپ شریف زادے نہیں ہو” ۔ اس کے جواب نے مجھے اور حیران کیا ۔۔ رُوٹھنے کے انداز میں اس نے جواب دیا کہ” عجیب بات ہے آپ کو مذہب سے لگاؤ نہیں، اب میں دوبارہ کبھی ایس ایم ایس نہیں کروں گا” گویا مجھ پہ احسان جتایا جا رہا تھا۔
میں نے اس کی حوصلہ افزائی کی کوشش بھی نہیں کی اور جواب نہیں دیا۔
اس واقعے کے بعد اب میں سوچتا ہوں کہ ایک زمانے میں ہم مفت یا سستے ایس ایم ایس کی خواہش کیا کرتے تھے، اور اب جب کہ یہ خواہش پوری ہو گئی ہے، اس کے استعمال کے کتنے مکروہ پہلو سامنے آرہے ہیں؟ بلاوجہ دوسروں کو بلا اجازت ایس ایم ایس بھیجنا کس قسم کا ذہنی سکون فراہم کرتا ہے؟ آپ کہیں گے کہ ایک ہی میسج پر اتنا رد عمل؟ مگر آپ یہ بھی تو سوچیں کہ ہر برائی پہلے چھوٹے پیمانے پر شروع ہوتی ہے۔۔۔