دھوکہ !!!.

گرمیوں کے دن تھےاور اس زمانے میں لوڈشیڈنگ نام کی کوئی چیز نہیں ہوا کرتی تھی۔ دوپہر کا وقت تھا اور دونوں بے چینی سے کسی کا انتظار کر رہے تھے۔ سرکاری کوارٹر تھا، ٹیلی فون کی سہولت صرف امراء اور سرکاری افسروں کو ہی میسر تھی۔ موبائل فون نام کی چیز کسی کے وہم و گمان میں بھی نہیں تھی۔ لہذا انتظار کی اذیت برداشت کرنے کے سوا کوئی چارہ بھی نہ تھا۔
تھوڑی دیر بعد ، مرد نے خاتون سے پوچھا، کب آئے گا یہ نالائق؟ کہیں رستہ نہ بھٹک گیا ہو۔
خاتون نے، جو خود بھی پریشان تھی، تحمل سے جواب دیا، اب بچہ نہیں رہا وہ، رستے پہچانتا ہے، آجائے گا۔ شائد دوستوں کے ساتھ کھیل رہا ہو۔ اور پھر کھڑکی سے جھانک کر دیکھا کہ شائد وہ رستے میں کہیں سےآتا نظر آجائے۔
کافی دیر بعد، وہ گھر کے دروازے پر پہنچا ، دستک دی، دروازہ کُھلا پا کر اندر داخل ہوا ، ماں باپ کو سلام کیا اور امتحانی گتہ ایک طرف پھینک دیا۔ ماں دیوانہ واراُٹھی، اور لپک کر اسے اپنی بانہوں میں لیا، ماتھے کو چوما اور بولی، کہاں رہ گیا تھا میرے لال؟
اُس نے ایک شان بے نیازی سے جواب دیا ۔ ماں میں دوستوں کے ساتھ بنٹے کھیل رہا تھا۔
باپ نے غصہ کرنا چاہا تو ماں نے اشارے سے منع کردیا۔
ماں نے بکھرے بالوں کو سنوارتے ہوئے پوچھا، اچھا آج کا پرچہ کیسا ہوا میرے بیٹے کا؟
بیٹے نے کھانے کی تلاش میں اِدھر اُدھر نظریں دوڑاتے ہوئے جواب دیا، اچھا تھا امی، مجھے تو آج بہت مزہ آیا۔ سب سوال آتے تھے مجھے۔
باپ نے پوچھا، کدھر ہے پرچہ؟
بیٹے نے ایک مُڑا تُڑا کاغذ فرمانبرداری سے باپ کے حوالے کر دیا۔ باپ نے پرچہ دیکھا اور پھر بیٹے سے سوالوں کے جواب پوچھنے لگا۔ لڑکے نے ناگواری سے جواب دیے اور ماں سمجھ گئی کہ بھوک لگی ہے۔ ماں جلدی سے اُٹھی کہ بیٹے کے لئے کھانا گرم کرے۔
اتنے میں باپ نے تبصرہ کیا ،پتہ نہیں جواب صاف صاف بھی لکھے تھےکہ نہیں اس کی لکھائی بہت گندی ہے۔ پتہ نہیں کیا کِیا ہوگا اِس نے پرچے میں۔
تو بیٹے نے اِٹھلا کر جواب دیا، ابو جی ، آج تو میں نے اپنی مِس کو دھوکہ دیا ہے۔۔ سارے سوال آتے تھے مجھے۔۔ مِس کو پتہ تھا، اور پھر بھی میں نے کچھ نہیں لکھا، خالی پرچہ دے کر آیا ہوں۔ مِس کو پتہ چلے گا تو بہت مزہ آئے گا۔
اِ س کے بعد جو کچھ ہوا، وہ ضبطِ تحریر کے قابِل نہیں۔