ابتدا

الیکشن کے جیتنے کے بعد ہمارا ارادہ تو یہ تھا کہ ہم اپنے نصب العین کی طرف توجہ دیں اور اپنے انتخابی وعدوں کو پورا کرنے کی کوشش کریں۔مگر الیکشن کے فورا بعد ہم پر دباو ڈالنا شروع کر دیا گیا تھا کہ ہسپتال کا چیف ایگزیکٹو ایک کرپٹ انسان ہے اور اس کو ہٹانے کے لئے ہڑتال سمیت ہر ممکن قدم اٹھایا حائے۔ ہم نے صورت حال جانے بغیر کسی قسم کا قدم اٹھانے سے انکار کر دیا۔

 

رمضان المبارک کا پہلا عشرہ ہمارے لئے بہت ذہنی دباو لایا۔ مگر الحمدللہ ہماری ثابت قدمی نے سب کے سامنے ہمارے موقف کی صداقت آشکارا کردی۔ ہم کسی قسم کا تصادم نہیں چاہتے مگر جب انسان کو مجبور کر دیا جائے تو پھر کچھ کرنا ہی پڑتا ہے۔ ہمارے سامنے پڑی مسائل کی ایک لمبی فہرست میں اولین مسئلہ ڈاکٹرز کی رہائش کا مسئلہ حل کرنا تھا۔
مرد اور خواتین ڈاکٹرز کے ہساٹلز کے وارڈن ان مسائل کو حل کرنے میں کچھ خاص دلچسپی نہیں دکھا پا رہے تھے، چنانچہ سب سے پہلے خواتین ڈاکٹرز ہاسٹل کے وارڈن کے استعفی کے بعد ایک کمیٹی بنائی گئی جس نے ہاسٹل میں مقیم غیر قانونی طور پر رہنے والوں کو نکالنے کا کام شروع کردیا گیا۔ اس دوران علم ہوا کہ ایک طالبہ کو غیر قانونی طور پر دو کمرے دئے گئے ہیں۔ اس کو نکالنے کو کوشش کی گئی تو ہسپتال کے چیف ایگزیکٹو نے بجائے کمیٹی کی مدد کے، اس طالبہ کی پشت پناہی کرتے ہوئے کمیٹی ہی کو تحلیل کرنے کا غیر قانونی قدم اٹھا دیا۔ اب وہ مسئلہ چل ہی رہا تھا، کہ ہم نے مردانہ ڈاکٹرز ہاسٹل کے لئے بھی ایسی ہی کمیٹی بنانے کا ارادہ کیا۔
مردانہ ڈاکٹرز ہاسٹل میں کامسیٹس ، پرائیویٹ میڈیکل کالجز ، میڈیکل ریپس اور پتہ نہیں کون کون لوگ رہ رہے ہیں مگر ڈاکٹرز کو رہائش نہیں‌ملتی۔ یہ الزام بھی لگایا جاتا رہا ہے کہ یہ کمرے در اصل کرائے پر دئے حاتے ہیں اور یہ کرایہ کہاں جاتا ہے، اللہ جانتا ہے۔

کل نئی ہاوس جاب کے لئے قریبا دو سو ڈاکٹرز کا انٹرویو ہے۔ یہ ڈاکٹرز اپنے لئے رہائش بھی مانگیں گے، اور ہماری طرف دیکھیں گے، آج ہم اس سلسلے میں منصوبہ بندی کر ہی رہے تھے کہ علم ہوا کہ چیف ایگزیکٹو نے پھر غیر قانونی طور پر اس کمیٹی کو تحلیل کر کے اپنے ایک منظور نظر کو ہاسٹل کا وارڈن بنا دیا ہے۔
اب ہسپتال میں تصادم کی سی کیفیت بن چکی ہے۔ ہمیں جائز طور پر ، قانونی کام کرنے سے روکا جا رہا ہے ، اور ہمارے حامی مشتعل ہیں۔ میرا بدھ کے دن امتحان بھی ہے۔ اور کل ایک اہم میٹنگ بھی ہے۔ اس صورت حال  کا علاج نہ کیا گیا تو مسئلہ اور بگڑ سکتا ہے۔ علاج یہی ہے کہ ہمیں ہمارے جائز کاموں سے نہ روکا جائے۔

ہم نے اب تک کے ہوم ورک کے مطابق یہ اندازہ لگایا ہے کہ اگر غیر قانونی رہائش پذیر لوگوں کو نکالا جائے تو تقریبا سارے ہاوس آفیسر رہائش حاصل کر سکتے ہیں، مگر ہمیں ریکارڈ تک رسائی نہیں دی جا رہی جس سے اندازہ ہو کہ کون کہاں رہ رہا ہے۔

 اب چیف ایگزیکٹو اور ہسپتال انتظامیہ سے دوٹوک بات کرنی ہی پڑے گی۔

دیکھئے آنے والے دن ہمارے لئے کیا پیغام لاتے ہیں۔