آج کل ہر ایک خرید سکتا ہے

اللہ اللہ کر کے ہم ضروری کاموں سے فارغ ہوکر ڈے روم میں بیٹھے ہی تھے کہ وارڈ بوائے نے آکر اطلاع دی کہ میڈیکل ریپ آئے ہیں۔

ہم سب تھکے ہوئے تھے اور ان کی باتیں سُننے کا ارادہ بالکل نہیں تھا مگر بات سُننی پڑی۔ وارڈ بوائے کو کہہ دیا کہ انھیں بھیج دے۔ تھوڑی دیر بعد دو ، ہشاش بشاش ، ٹو پیس سوٹ میں ملبوس افراد داخل ہوئے۔ انھوں نے اپنا تعارف کروایا اور پھر اطلاع دی کہ ہم سب کے لئے ایک معلوماتی لیکچر کا اہتمام کیا گیا ہے اور کچھ ہی دیر میں یہ لیکچر شروع ہو جائے گا۔ پوچھنے پر بتایا گیا کہ یہ لیکچر ایک دوا کے بارے میں ہے جو پاکستان میں ان کی کمپنی سب سے پہلے متعارف کروا رہی ہے۔ کمپنی والوں کو ہم جانتے ہیں، کمپنی کی ادویات بھی اچھی ہیں اور ان ادویات نے ہم ڈاکٹروں کو اب تک مایوس نہیں کیا ہے، چُنانچہ تجسس پیدا ہوا اور سب کا ارادہ بن گیا کہ لیکچر سُنا جائے۔

اب چھُٹی کا وقت بھی قریب تھا اور سب لوگوں کی خواہش تھی کہ لیکچر کے بعد کے ‘لوازمات’ پر جلد اس جلد ہاتھ صاف کیا جائے۔اس لئے موضوع سخن کو خاص توجہ کسی نے بھی نہ دی۔ ہمارے مقرر ایک ڈاکٹر صاحب تھے جو کمپنی کی طرف سے اس دوا کو متعارف کروانے آئے تھے۔ بہر حال اُن کی کاوش اچھی تھی اور انھوں نے بڑے اچھے انداز میں جب کہ لوگ جماہیاں لے رہے تھے، دوا کے بارے میں ہمیں آگاہ کیا۔ اس کے بعد جب بحث شروع ہوئی تو میں نے ایک دو نکات کو لے کر موصوف سے بات کرنا چاہی تو انھوں نے یہ کہہ کر مجھے لاجواب کر دیا کہ ‘ کمپنی آپ کو تمام تفصیلات مہیا کر سکتی ہے، اور بد قسمتی سے اس وقت ہم وہ دستاویزات ساتھ نہیں لائے’۔ بات معقول تھی اس لئے میں خاموش ہو گیا۔ دوا کے مضر اثرات کے بارے میں ہم نے پوچھا تو ہمیں بتایا گیا کہ چونکہ اس دوا کے اجزاء معمول کی نسبت کم مقدار میں ڈالے گئے ہیں اس لئے یہ دوا دوسری دواؤں کی نسبت قدرے محفوظ ہے۔ یہ اور بات کہ گھر آکے میں نے جب انٹرنیٹ پر تلاش کیا تو بہت سی نئی باتیں پڑھنے کو ملیں، اور اندازہ ہوا کہ ان لوگوں کی باتوں کو مِن و عن قبول نہیں کرنا چاہئے، ورنہ یہ لوگ تو ہمیں تباہ کر دیں گے۔۔

یہ دوا بنیادی طور پر ڈپریشن کے مرض کے لئے بنائی گئی ہے اور اس سلسلے میں ہمارے ایک دوست نے کافی اچھے نکات بھی اُٹھائے مگر بات وہیں پر آ کر رُک جاتی کہ، ‘تفصیل سے جواب ان دستاویزات میں آپ کو مل جائے گا جو کمپنی بعد میں آپ کو دے سکتی ہے’۔

یہ بعد میں نے آج تک نہیں دیکھا۔۔۔ خیر یہ تو ایک جملہ معترضہ تھا۔۔

چائے کے دوران ڈاکٹر صاحب سے بات چیت کا موقع ملا تو فرمانے لگے کہ بہت سے لوگ ڈپریشن کی ایسی علامات کے ساتھ آتے ہیں کہ جو کسی بیماری کے ساتھ مخصوص نہیں ہوتیں، لہذا ہمیں ان لوگوں کے بارے میں ڈپریشن کا شبہ ضرور کرنا چاہئے اور علاج شروع کر دینا چاہئے۔ میں نے عرض کیا ، کہ بغیرکسی تفتیش کے تو میں کسی کو بھی ڈپریشن کا لیبل نہ لگا ؤں۔ تھوڑی دیر خاموش رہنے کے بعد بولے،’ ایسے لوگ بھی تو آتے ہوں گے جو جسسمانی دردوں کی شکایت کرتے ہوں گے، جہاں درد کی دوا لکھی وہاں یہ دوا بھی لکھ دیجئے گا، پچاس ساٹھ مریضوں کو لکھیں گے تو آپ کو اندازہ ہوجائے گا کہ کتنی مفید ہے ‘

میں نے پوچھا، ‘اگر وجہ نہ بنتی ہو تو بھی ؟ ‘

کہنے لگے ، ‘ ہاں آخر اتنی مہنگی بھی تو نہیں ہے، صرف ۲۵ روپے کی ۱۰ گولیاں ہیں، آج کل ہر ایک خرید سکتا ہے۔’ اور دوسری جانب چلے گئے۔۔ میں حیران پریشان کھڑا رہ گیا۔۔