میرے سٹیریو ٹائپ

ہم لوگ سٹیریو ٹائپس کے مطابق چلنے کے عادی ہیں۔ سٹیریو ٹائپ کو اس لغت
نے کچھ اس طرح اردو میں ترجمہ کیا ہے کہ :کسی گروہ کے عقائد و رویے جو متعین ہو چکے ہوں ۔ میں آس پاس نظر دوڑاتا ہوں تو مجھے یوں نظر آتا ہے کہ ہم سب اپنے اپنے نظریات سے جڑے رہنے میں ہی عافیت و راحت محسوس کرتے ہیں۔ دور کیوں جائیے میں اپنی ذات کو جب دیکھتا ہوں تو میرے بہت سے ایسے خیالات ہیں جن کے مطابق دنیاوی امور کو برتنا میرے لئے زیادہ آسان ہے بنسبت حقائق کی روشنی میں ان خیالات کو بدلنا۔ یہ اصول شاٗئد ہر جگہ منطبق نہ ہو۔ اور کچھ استثنائی حالتیں بھی موجود ہیں جیسے کے مذہبی عقائد۔

یہ سٹریو ٹائپ ہماری زندگی میں ہر جگہ کام کرتے دکھائی دیتے ہیں۔ مثلا کسی علاقے میں رائج روایات سے معمولی سا اختلاف بھی انسان کو اپنوں سے قطع تعلق کی بے رحم صورت سے آشنا کر سکتا ہے۔ اور بعض اوقات یہ سٹیریو ٹائپ موجود ہوتے ہوئے بھی نظر نہیں آتے۔
جب میں نے اپنے ایک ہم جماعت سے برطانیہ میں پاکستانیوں یا دیگر ایشائیوں سے امتیازی سلوک بارے استفسار کیا تو انھوں نے بتایا کہ اگرچہ قانونی طور پر ایسے کسی عمل پر پابندی ہے جس سے نسل پرستی جھلکتی ہو مگر اَِٹس ان دی اٗیر۔ یعنی موجود ہوتے ہوئے بھی نا موجود ہے۔

وطن عزیز بھی ایسی اقوام کا ملغوبہ ہے جو اپنے اپنے سٹیریو ٹائپس سے جڑی کولہو کے بیل کی مانند ایک چکر میں اپنا سفر طے کر رہی ہیں۔ اور یہ سٹریو ٹائپس کسی ایک خاص قوم کے ساتھ مخصوص نہیں۔ ہر ایک قوم نے اپنے آپ کو دوسروں سے ممتاز کرنے کے لئے دوسروں کے بارے میں کچھ خیالات یا نظریات گھڑ لئے ہیں اور ان پر سختی سے کاربند بھی ہے۔ اپنی میراث پر فخر کوئی بری بات نہیں مگر جب یہ فخر ایک خاص حد سے بڑھ کر دوسروں سے نفرت یا ان کی تحقیر میں تبدیل ہو جائےتو بُری بات ہے۔ بلکہ قابل نفرین عمل بن جاتا ہے۔

علاقائی نسبت سے قطع نظر، انھی سٹریو ٹائپس میں سے کچھ مذہب سے متعلق ہیں۔ کچھ لوگ اس حد تک چلے جاتے ہیں کہ وہ مذہبی احکامات کے لغوی معانی ہی کو اصل سمجھتے ہیں، اور غالبا یہی اصول خوارج کا تھا۔ اس فتنہ نے امت مسلمہ کو بہت نقصان پہنچایا۔ دوسری جانب وہ لوگ ہیں جو مذہبی احکامات کی تاویلات میں اس قدر آگے چلے گئے ہیں کہ دین کی اصل روح بگڑ چکی ہے۔ ہمارے آس پاس بہت سے ایسے لوگ ہمیں نظر آ جائیں گے جو دینی احکامات کی اپنی من مانی تاویل کر کے خوش بیٹھے ہیں۔ کچھ لوگ ایسے بھی مل جائیں گے جو دین کے انھی احکامات پہ ہی عمل کریں گے جو ان کو اچھے لگیں گے اور اگر بُرے لگیں تو کوئی نئی تاویل سامنے لے آئیں گے۔
لا مذہبیت میں بھی کچھ ایسے رجحانات سامنے نظر آتے ہیں۔ لا مذہب یا دہرئیے عام طور پر مذہب کے نام پر وقوع پذیر ہونے والے تاریخی واقعات کو بطور مثال پیش کر کے مذہب سے لوگوں کو متنفر کرنے کی کوشش میں مصروف نظر آتے ہیں۔ موجودہ دور میں رچرڈ ڈاکنز ایسا ہی ایک دہریہ ہے جس کی کتاب دی گاڈ ڈیسیپشن کے کچھ صفحات پڑھنے کا موقع ملا۔

اس سلسلے میں کچھ لوگوں نے مذہب پر عمل پیرا لوگوں کی تضحیک کے لئے ایک اصطلاح مذہب پرست بھی ایجاد کر لی ہے۔ گویا مذہب پرست ہونا ایک جرم ٹھہرا۔
یہاں بات تفصیل سے کی جائے تو بہت بحث کی بہت سی نئی جہتیں کھل سکتی ہیں مگر میرا ارادہ قطعا اس طرف جانے کا نہیں ہے۔

ہم سب اپنے اپنے سٹیریو ٹائپس کے غلام ہیں۔ ہم مذہب پرست ہوں یا دہرئیے، ہم اپنی انا کی تسلی کی خاطر کسی دوسرے کی بات سننے کو تیار نہیں۔ ہم صرف اس لئے کسی کی بات نہیں سنیں گے کہ اس کی بات کچھ وزن رکھتی ہوگی۔ اور یہ رویہ علمی حلقوں تک ہی محدود نہیں ہے۔ عام زندگی میں بھی ہم دوسر کی بات سمجھے بغیر اپنا رد عمل فوری طور پر پیش کر دیتے ہیں جس سے نفرتیں بڑھتی ہیں، گھٹتی نہیں۔
بات بات پہ فتوے، مرنے مارنے کی باتیں، ایک دوسرے کو نیچا دکھانے کی کوشش میں تمام حدوں کو پار کرلینا، اس سے ایک ہی بات ثابت ہوتی ہے کہ ہمیں اپنا سٹیریو ٹائپ حق بات کے مقابلے میں زیادہ عزیز ہے۔

میں بھی، جیسا کہ پہلے عرض کر چکا ہوں کچھ سٹریو ٹائپس کے سحر میں بندھا ہوا ہوں۔ ان سے نجات
پانا میرے لئے ممکن نہیں، شائد کسی کے لئے بھی ممکن نہیں۔

فی الحال اردو پلگ ان موجود نہیں ہے، لہذا اردو میں تبصرہ ہر کس و ناکس کے لئے ممکن نہ ہوگا۔