فتویٰ

روز روز غیر معیاری کھانا کھانا کسے پسند تھا، مگر وہ لوگ تعلیم کی خاطر آئے ہو ئے تھے اور مقصد اتنا عظیم تھا کہ اس کی خاطر دنیاوی تکالیف برداشت کرنا معمولی سی بات تھی۔ کھانے میں جو سالن ملتا وہ اکثر پانی پر مشتمل ہوتا اور اس میں جو سبزی یا دال پکائی گئی ہوتی ، اس کے چند چھوٹے حصے بطور نمونہ تیر رہے ہوتے۔

صبر کی بھی آخر ایک حد ہوتی ہے، ایک دن تنگ آکر دو طالب علم دال کی پلیٹ لے  کر درس گاہ کے منتظم کے پاس جا پہنچے۔

اجازت لینے کے بعد ایک طالب علم یوں گویا ہوا، ’ جناب میں اور میرا دوست ایک مسئلے پر الجھ گئے ہیں اور ہمیں امید ہے کہ آپ اپنی شفقت سے اس مسئلہ کاحل نکال لیں گے۔ وہ مسئلہ یہ ہے کہ میں کہتا ہوں کہ اس سالن کے پانی سے وضو ہو سکتا ہے،  میری دلیل یہ ہے کہ یہ پانی بہت سیال ہے، آرام سے بہ جاتا ہے، اور اس میں کسی قسم کی آلائش نظر نہیں آتی، پانی بد ذائقہ بھی نہیں ہے اور اگر اس میں کچھ نظر آتا ہے تو وہ اتناہی ہے جتنا کہ چشمے کے بہتے ہوئے پانی میں۔  جبکہ میرا دوست یہ کہتا ہے کہ نہیں، اس پانی سے وضو نہیں ہو سکتا ، کیونکہ یہ پانی استعمال ہو چکا ہے، اس میں غلے کی آمیزش ہو چکی ہے جس کا ثبوت دال کے چند تیرتے ہوئے دانے ہیں اور اس کا ذائقہ عام پانی سے مختلف ہے، گرچہ تھوڑا ہی سہی، مگر مختلف ہے، پھر اس کا رنگ بھی کافی تبدیل ہو چکا ہے۔

حضرت اب آپ تصفیہ فرمائیں اور ہمیں بتائیں کہ پلیٹ کے اس پانی سے وضو ہو سکتا ہے کہ نہیں۔‘

منتظم صاحب، جو کہ اپنی زندگی میں اس علاقے میں اخون صاحب کے نام سے جانے جاتے تھے، نے فورا صورت حال بھانپ لی، اور دونوں کو ذرا بہتر کھانا مہیا کر دیا گیا۔ انھوں نے لنگر والوں کو ہدایت کی کہ کھانے کے معیار کو بہتر بنائیں۔  اس کے بعد طالب علموں کے ساتھ کیا ہوا، راوی خاموش ہے۔

پشتو میں جو مشہور ہے اس کے مطابق اخون  صاحب نے لنگر والوں کو کہا کہ ذرا ایک مٹھی  دال اور ڈال دیا کرو نا۔

یہ واقعہ میرے والد صاحب نے کافی مرتبہ مجھے سنایا ہےأ طالب علموں کا تو پتہ نہیں، مگر والدصاحب بتاتے ہیں کہ یہ اخون صاحب ، در اصل اخوند عبدالغفور تھے جو کہ والی سوات میاں گل کے دادا تھے۔

ان سے بات پیری مریدی  سے شروع ہوئی تھی اورانھوں نے یہ واقعہ دوبارہ تازہ کر ڈالا۔ پہلے تو ہنسی کا کوئی سبب مل جاتا تھا اس واقعے میں مگر  جب سے ادھر ادھر سے پڑھنا شروع کیا تو احساس ہوا کہ یہ ایک ایسا طرز عمل ہے جو صرف مدرسوں تک محدود نہیں۔ دنیا کے ہر معاشرے میں فلاحی یا اجتماعی نوعیت کے اداروں میں ایسا ہی ہوتا ہے۔ مثلا چارلس ڈکنز کا ناول آلیور ٹوئسٹ لے لیں یا ایک اور کہانی جو ہم نے اپنی چھٹی جماعت میں پڑھی تھی، نکولس نکلبائی کے نام سے۔ ان سب میں ایک بات مشترک تھی کہ بچے جن کا پوچھنے والا کوئی نہیں تھا، استحصال کا شکار تھے۔ بے شک یہ کردار جن کا میں نے ذکر کیا افسانوی کردار تھے ، مگر یہ بھی حقیقت ہے کہ ادیب اپنے معاشرے سے متأثر ہو کر ہی لکھتا ہے

مغرب میں شائد یہ بات اب نہ ہو، یا انھوں نے اپنے معاشرے کے اس ناسور پر پردہ ڈالنا سیکھ لیا ہو، مگر ہمارے معاشرے میں یہ بات بہت عام ہے، اور اس بات کاتکلیف دہ پہلو یہ ہے کہ جن کا استحصال ہوتا ہے، انھی کے نام پر امداد مانگی جاتی ہے۔استثنائی حالتوں کے سوا، اکثر وہ لوگ جو کوئی ایک فلاحی ادارہ بناتے ہیں، کچھ عرصے بعد مالدار ہو جاتے ہیں۔ اور تکلیف دہ بات یہ ہے کہ ان میں سے اکثریت یہ استحصال مذہب کے نام پر کر رہی ہے۔ چاہے یہ مذہبی رسومات ہوں ، مذہبی تہوار ہوں یا مذہب سکھانے کا معاملہ ہو یہ استحصال جاری ہے اور ہم عوام کو ایسے جکڑا گیا ہے، ہمیں اتنا ڈرایا گیا ہے منافقیں کےعذاب سے کہ ہم یہ پوچھنے کی جرأت نہیں کر سکتے کہ بھائی ہماری محنت کس ٹھکانے لگی؟ ہمارے پیسے کا کیا ہوا اور ہمارے بچوں کا کیا ہو رہا ہے جنھیں تم پڑھا رہے ہو۔  ایک خاص حلیے کا شخص اگر کوئی عجیب  بات کر دے تو ہم اس سے پوچھنے کی ہمت نہیں کر سکتے کہ شائدسوال پوچھنے پر  ہم دائرہ اسلام سے خارج ہو جائیں۔