سی پی ایس پی کے وفد کا دورہ

ہمیں تو یہی پتہ چل سکا۔

لطف اس وقت آیا جب راولپنڈی میڈیکل کالج کے پروفیسر اور سی پی ایس پی کے کونسلر ، ڈاکٹر شعیب شفیع نے ہمارے یونٹ کا دورہ کیا۔ اُن کو یونٹ میں کام کرنے والے تمام ٹرینی ڈاکٹرز سے ملاقات کا موقع ملا۔ اور اُنھوں نے کوشش کی کہ اپنے شیڈول میں سے وقت نکال کر ہم سے بات چیت کریں۔

اُن کو صوبہ سرحد میں کام کرنے والے ٹرینی ڈاکٹرز کی حالت کے بارے میں جان کر بہت حیرانی ہوئی۔ اور ہمیں حیرانی اس وقت ہوئی جب انھوں نے بتایا کہ صوبہ پنجاب میں اس وقت ہاؤس آفیسر ڈاکٹرز کا وظیفہ اٹھارہ ہزار روپے اورپوسٹ گریجویٹ ٹرینی ڈاکٹرز کا وظیفہ بائیس ہزار روپے ہے۔ ہمارے ہاں پوسٹ گریجویٹ ڈاکٹرز کا وظیفہ وہاں کے ہاؤس آفیسرز سے بھی اتنا کم ہے کہ بتاتے ہوئے شرم آتی ہے۔

ڈاکٹر شعیب شفیع سے بہت سے مسائل پر کُھل کر بات چیت ہوئی اور اس بات پر اتفاق ہوا کہ جب تک حکومتی انتظام درست نہیں ہوتا ، ڈاکٹروں کی اعلی تعلیم کا یہی حال رہے گا۔ ان سے پی جی ایم آئی اور ٹریننگ کے مسائل پر بھی بات چیت ہوئی، اور ان کو بتایا گیا کہ اگرچہ ایف سی پی ایس پارٹ وَن کا سال میں دو سے تین مرتبہ امتحان ہوتا ہے، ڈاکٹرز کی با وظیفہ ٹریننگ کے لئے انٹرویو ایک ہی دفعہ ہوتے ہیں، نتیجہ یہ کہ بہت سے ڈاکٹرز کو اپنی ٹریننگ کے لئے ایک سال تک کا انتظار کرنا پڑتا ہے۔ ہم نے ان سے درخواست کی کہ صوبہ سرحد میں ڈاکٹروں کے لئے یہ مسئلہ ہے اور اس کا حل نکالا جائے۔

ہم اُس وقت بھی حیران ہوئے جب انھوں نے بتایا کہ اُن کے ہسپتال میں ، حکومت پنجاب کے انتظامات کی وجہ سے نوے فیصد تک ادویہ مفت فراہم کی جاتی ہیں۔ جب کہ یہاں تو اُلٹا حساب ہے۔ اور جس حساب سے وہاں صحت کے شعبے میں ترقی ہو رہی ہے، جلد ہی پنجاب ہم سے بہت آگے نکل جائے گا۔

کل ہمیں احساس ہوا کہ اب بھی اگر ہم نے اپنے حقوق کے لئے آواز بلند نہ کی تو پھر شائد کبھی بھی نہ کرسکیں۔