سیاست

آج دن بھر سونے کے بعد شام کو آوارہ گردی کا وقت مِلا تو دوبارہ کالج کی طرف جا نکلا۔
دوست کے ساتھ کیمپس کی سڑکوں پر آوارہ گردی کرتے ہوئے میں نے مُختلف جگہوں پر شامیانے آویزاں دیکھے۔ وہاں جا کر پوچھنے پر علم ہوا کہ سوات، دیر، اور بونیر کے مہاجریں کےلئے ایوب میڈیکل کالج کے طلباء نے امدادی رقوم اور سامان جمع کرنے کا کام شروع کیا ہوا ہے۔ وہاں موجودطلباء سے بات چیت کے بعد اندازہ ہوا کہ ماشاءاللہ ہم لوگوں میں نیکی کا جذبہ اب بھی موجود ہے اور ہم نے مشاہدہ کیا کہ کہ عطیات کی وصولی کی رفتار قابلِ ستائش ہے۔
اس کے ساتھ ساتھ مختلف آراء بھی سُننے کو ملیں۔ کچھ لوگوں کا ۲۰۰۵ کے زلزلے کے بعد کی صورت حال کے حوالے سے بہت تلخ تجربہ تھا اور وہ یقین کرنے کو تیار ہی نہ تھے کہ یہ سب کچھ واقعی مستحقین تک پہنچ پائے گا۔ پاکستان اسلامک میڈیکل ایسوسی ایشن کے زیر اہتمام بھی کافی کچھ ہوتا نظر آیا ہے، مگر بات وہی، کہ ‘ اس بات کی کیا ضمانت کہ یہ سب کچھ وہاں پہنچ پائے گا’۔ حالانکہ میرے خیال میں اگر ہم کچھ عطیہ کر رہے ہیں تو ہم اس چیز کے مستحق تک پہنچنے کی ذمہ داری سے اس وقت سبکدوش ہو جاتے ہیں جب کوئی اس بات کی ذمہ داری خود پر لے لے۔
یہی بات یہاں منطبق ہو سکتی ہے۔ ایک شخص ذمہ داری لے رہا ہے، آپ جو کچھ ممکن ہو سکتا ہے، عطیہ کر دیں اور باقی اللہ پر چھوڑ دیں۔ امانت میں خیانت اس شخص اور اللہ کا معاملہ ہے۔
بہر حال ایک بات جو مجھے بُری طرح کھٹکی ، وہ یہ تھی، کہ اگرچہ مقصد ایک تھا، ادارہ ایک تھا، عطیات کی منزل بھی ایک نظر آتی تھی ، مگر طلباء کی تنظیموں نے اپنے اپنے طور پر علیحدہ کیمپ بنائے ہوئے تھے۔ ہر ایک تنظیم کی ڈیڑھ اینٹ کی مسجد مجموعی طور پر کوئی اچھا تائثر نہیں چھوڑ رہی تھی۔ کیا ہی اچھا ہوتا کہ ایک ہی جگہ پر ایک مرکزی کیمپ لگایا جاتا، اور سب عطیات وہاں جمع کیئے جاتے؟
ہم لوگ، اتنے بے حِس ہو چکے ہیں کہ کسی بھی معاملے میں بھی اپنی سیاست چمکانے سے باز نہیں آتے۔ ہر جگہ اپنے مفاد کو دیکھ کر فیصلہ کرتے ہیں اور یہ انتشار اور مفاد پرستی ہماری قوم کی رگ رگ میں رچی بسی ہوئی ہے۔