سب مایا ہے – 2

گزشتہ اظہاریے میں میں نے کوشش کی تھی کہ انسانی اعصابی نظام کے ایک حصے، یعنی سینسری سسٹم کا ایک مختصر تعارف پیش کیا جائے۔ بہت سی وجوہات کی بنا پر میں اس نظام کی تفصیل میں نہیں گیا مگر میں نے یہ جتانے کی کوشش کی کہ ہمارا اپنے آس پاس کی دنیا سے رابطہ اس اہم نظام کی بدولت ہے، جو ہمیں بہت سے مواقع پر درست فیصلہ کرنے میں مدد دیتا ہے۔
موضوع کی طرف واپس آتے ہوئے، میں اتنا کہنا چاہوں گا کہ گزشتہ اظہاریے میں میں نے جن متضاد منظر ناموں کا ذکر کیا تھا، دراصل وہ ایک ہی نظام کے دو رُخ ہیں۔ ہماری زندگی کی تمام خوشیاں اور غم ہماری حسیات پہ انحصار کرتی ہیں۔
ایک جملہ آپ نے اکثر سنا ہوگا، محفلوں میں کسی کا شکوہ اکثر ان الفاظ میں کیا جاتا ہے کہ ” فلاں بہت بے حس ہے” گویا حس کا نہ ہونا ، شخصیت کے ایک منفی پہلو کو اجاگر کرتا ہے۔

ہم یہاں فی الحال طبعی حسوں کی بات کریں گے۔ کسی کی بصارت زائل ہو، یا قوت سماعت، توازن برقرار رکھنے کی صلاحیت کھو جائے یا چکھنے کی حس، ہر صورت میں زندگی بے معنی اور ادھوری سی ہو جاتی ہے۔ ہماری یہ تمام خوشیاں ان برقی اشاروں کی محتاج ہیں جو کسی حس سے متعلقہ عضو کے کام کرنے کے دوران پیدا ہوتے ہیں۔ یہ برقی اشارے اعصابی نظام میں سفر کرتے ہوئے دماغ تک جاتے ہیں اور دماغ کے متعلقہ حصے کو “جگا” دیتے ہیں، یوں ہم زندگی سے لطف اندوز ہوتے ہیں۔

دائیں ہاتھ دی گئی تصویر اس ساری بات کا خلاصہ ہے۔ یہ تصویر ہمارے بصری نظام کے کام کو ظاہر کرتی ہے۔ ہم جو کچھ بھی دیکھتے ہیں، وہ برقی اشاروں کی صورت میں آپٹک نرو کے ذریعے آکسپٹل کارٹیکس تک پہنچا دیا جاتا ہے۔ یہ کارٹیکس دماغ کے عقبی حصے میں واقع ہے، اور جیسا کہ آپ نے فلموں میں دیکھا ہوگا، اکثر ہیرو کی بصارت سر کے پچھلے حصے میں چوٹ لگنے سے زائل ہو جاتی ہے۔ ویسے ہی یہ حصہ در حقیقت بہت اہمیت کا حامل ہے۔ یہ حصہ کام کرنا چھوڑ دے تو چاہے دنیا کی سب سے خوبصورت آنکھیں کیوں نہ ہوں، کبھی دیکھ نہ پائیں گی۔
ایک اور مثال پیش کرنا چاہوں گا/

آپ نے شیزو فرینیا جیسی بیماری کا نام سنا ہوگا۔ اس کو جنون ، پاگل پن، اور غالبا مالیخولیا کے نام سے بھی پکارا جاتا ہے۔ اس مرض کی علامات تو کافی ہوتی ہیں، مگر سب سے جانی پہچانی علامات میں مریض کو آوازیں سنائی دیتی ہیں۔ مریض کو اپنے آس پاس جانی پہچانی چیزیں یا انسان بھی نظر آ سکتے ہیں جو کہ دوسروں کو نظر نہیں آتے۔

اس بات کی تحقیق کے لئے کہ کیا یہ آوازیں، یا بصری معاملات واقعی ان مریضوں کے ساتھ پیش آتے ہیں یا ان کو کوئی غلط فہمی ہوتی ہے، طبی ماہرین بہت عرصے سے جستجو میں لگے ہوئے تھے۔ پازیٹران ایمیشن ٹوموگرافی یا پی ای ٹی سکین کے ذریعے بالآخر کسی حد تک اس سوال کا جواب مل گیا ہے۔

یہ تصویر شیزو فرینیا کے ایک مریض کے دماغ کا پی ای ٹی سکین ہے۔ جو کہ اس وقت کیا گیا جب اسے آوازیں سنائی دے رہی تھیں۔ اس تصویر میں دماغ کے ان حصوں میں رنگ برنگی روشنیاں نظر آ رہی ہیں جو کہ سننے اور دیکھنے سے متعلق ہیں۔ اس کا مطلب گویا یہ ہوا کہ اگرچہ ہم نہیں سُن پا رہے، مگر یہ مریض واقعتا سُن رہا ہے۔ اور اس کے سننے کا ثبوت دماغ کے متعلقہ حصوں کا یہ سکین ہے جو ان حصوں میں کچھ کام ہوتا دکھا رہا ہے
۔ مگر مریض تو کو شیزو فرینیا ہے؟ وہ تو بیمار ہے اور ان آوازوں کو سننے کا دعوی کر رہا ہے جو صحت مند انسانوں کو سنائی نہیں دے رہیں۔ تو یہ سب کیا ہے؟

اگر کسی صحت مند انسان کا بات چیت کے دوران دماغ کا پی ای ٹی سکین کیا جائے تو کم و بیش یہی تصویر سامنے آئے گی۔ تو پھر بیمار کون ہوا؟

دیکھنے میں تو یہ ایک مشکل سوال ہے مگر، ایک صحت مند انسان کے دماغ میں سننے اور دیکھنے کی حس کے برقی اشارے وصول کرنے والے حصے کام اسی وقت کریں گے جب کوئی برقی اشارہ بیرونی دنیا سے کوئی اثر قبول کرے گا۔
شیزو فرینیا میں یہ حصے ایک لحاظ سے خود ہی متحرک ہو جاتے ہیں اور مریض کو آوازیں سنائی دیتی ہیں یا بصری واہمے نظر آنے لگتے ہیں۔

اس ربط پر آپ شیزو فرینیا کے کچھ مریضوں کے انٹرویو سُن سکیں گے۔

یہاں تک کی گفتگو کا مقصد یہ واضح کرنا تھا کہ، ہمارا جسم اپنے آس پاس کے ماحول سے اثر قبول کرتا ہے۔ یہ اثر بیک وقت مفید بھی ہے اور مضر بھی، مگر بیرونی دنیا سے تعامل اس جسم کے لئے ناگزیر ہے۔ کیونکہ اسی تعامل کے نتیجے میں جسم اپنے مستقبل کے اہداف کا تعین کرتا ہے۔ اسی تعامل کے نتیجے میں مختلف کیفیات پیدا ہوتی ہیں جن کو ہم خوشی، بھوک، رجا، یاس، خوف ، امید اور اطمینان کا نام دیتے ہیں۔

جاری ہے۔

حوالہ جات:

http://www.nytimes.com/interactive/2010/09/16/health/healthguide/te_schizophrenia.html
http://www.healthline.com/galeimage?contentId=gend_02_00310&id=gend_02_img0093