حضرات ایک ضروری اعلان سنئیے

روز صبح ایک نئی آس کی بنیاد پر ایک نئے مستقبل کی تلاش میں ہم اپنے کاموں پہ نکل جاتے ہیں۔ اگر ہم زمیندار ہیں تو کھیتوں کی طرف، اگر نوکر پیشہ ہیں تو اپنے دفتروں کی طرف۔۔ بڑے شہروں میں صبح کے اوقات میں لوگوں کی جلدی دیکھنے کے قابل ہوتی ہے۔ ہر ایک اس کوشش میں ہوتا ہے کہ وہ کسی طور اپنی منزل پر پہنچ کر اپنا کام شروع کر دے۔ اپنے کام میں دلچسپی کی وجہ ہر ایک کے لئے مختلف ہوتی ہے، کسی کو اپنی بیٹی کی شادی کا جہیز تیار کرنا ہے،
کسی کو اپنی بیمار ماں کے علاج کے لئے لیا گیا قرضہ بھی تو اتارنا ہے اور کو ئی صرف اس لئے اپنے کام کی جگہ پر موجود مشکلات کو نظر انداز کر کے وقت
پر پہنچنے کی کوشش کرتا ہے کہ اگر یہ نوکری بھی چھوٹ گئی تو ؟؟؟

زندگی کی یہ دھکم پیل اپنی جگہ بہت دلچسپ بھی ہے اور بہت بے رحم بھی۔

آج کل سردیوں کے موسم میں یہاں جب تقریبا سب ہی نوکری پہ جانے میں سستی کا مظاہرہ کرتے ہیں تو اس دوران ایک اور کام بھی ہو رہا ہوتا ہے۔ کسی نہ کسی محلے میں ایک عدد رضا کار ایک رقعہ ہاتھ میں تھا مے محلے کی مسجد میں دا خل ہو تا ہے، لاوڈ سپیکر کا سوئچ تلاش کرتا ہے، گلا کھنکار کر صاف کرتا ہے اور پھر ایک خاص لے میں یوں گویا ہوتا ہے

“حضرات ایک ضروری اعلان سنئیے۔۔۔“

یہ‌ یک عبارتی مگر ذرا طویل اعلان ، آپ سمجھ گئے ہوں گے، کسی کی رحلت کا اعلان ہوتا ہے۔ اس اعلان میں مرحوم کے نام کے ساتھ ساتھ اس کے اہم رشتہ داروں کا بھی ذکر ہوتا ہے جس سے اس کی زندگی میں اس کی سماجی حیثیت کا اندازہ لگایا جا سکتا ہے۔ آج کل ہمارے آس پاس کی مساجد سے اوسطا ۴ کے قریب ایسے اعلان روزانہ ہو رہے ہیں ۔

لباس بدلتے ہوئے، یا ناشتہ کرتے ہوئے جب اس اعلان کی آواز کانوں میں آتی ہے تو دل ایک لمحے کے لئے ڈوب سا جاتا ہے۔ میں اپنے آپ سے نظریں چراتا ہوں۔ کہیں کوئی سرگوشی کرتا ہے، ” تیرے اعلان میں کیا کہا جائے گا؟ ” واقعی، میں‌سوچتا ہوں، میرے بارے میں جب اعلان ہوگا تو کیا کہا جائے گا؟ کیا کسی کا لقمہ منہ تک پہنچنے سے پہلے گرے گا؟ کیا کوئی بال بناتے ہوئے رک کر سوچے گا کہ یہ کون تھا؟ کیا یہ اعلان سنا بھی جائے گا یا لاوڈ سپیکر میں بے وقت کی پھونک سن کر ہی نظر
انداز کر دیا جائے گا؟

سر جھٹک کر میں جلدی سے ناشتہ مکمل کرتا ہوں، لباس بدل کر والدین کو سلام کر کے باہر نکل جاتا ہوں، زندگی کی دوڑ میں شامل ہونے کے لئے۔۔ آخر میرے بھی کچھ خواب ہیں۔ میں نے بھی تو کچھ بننا ہے۔