الیکشن کا نتیجہ

آج ۱۰ اگست ۲۰۱۰ کو ایوب میڈیکل انسٹیٹیوشن میں دوسرے تاریخ ساز الیکشن ہوئے۔ اس الیکشن میں گزشتہ کابینہ کے صدر نے ایک نئی کابینہ اپنی صدارت میں ڈیموکریٹس کے نام سے نامزد کی اور ان کے مقابلے میں ہم گرینڈ ڈاکٹرز الائنس کے نام سے میدان میں اترے۔

 

گرینڈ ڈاکٹرز الائنس ایک سوچا سمجھا اتحاد نہ تھا۔ ہم، ینگ ڈاکٹرز ایسوسی ایشن خود اپنے نام سے الیکشن میں حصہ لینا چاہتے تھے، مگر بہت سے زمینی حقائق کے پیش نظر ہمیں یہ ارادہ ترک کرنا پڑا اور ہمیں دوسری جماعتوں کے ساتھ مذاکرات کے بعد ایک گرینڈ ڈاکٹرز الائنس بنانا پڑا۔ اس میں ہمارے ساتھ ہزارہ میڈیکل ایسوسی ایشن، پاکستان اسلامک میڈیکل ایسوسی ایشن اور پیپلز ڈاکٹرز فورم شامل ہوئے۔

کابینہ کے نامزد کردہ ارکان بھی اسی تناسب سے شامل کئے گئے۔ ہم نے ڈاکٹرز اتحاد کی خاطر صدارت ہزارہ میڈیکل ایسوسی ایشن کے نامزد کردہ رکن کے حوالے کی ، حال آنکہ اس فیصلے سے ہمارے بہت سے ارکان کو اختلاف تھا۔ ہمارے بہت دوست اس فیصلے پر ہم سے ناراض ہوئے، مگر ہمیں وسیع تر تناظر میں یہ فیصلہ کرنا پڑا۔ یہ ایک کڑوا گھونٹ تھا جو ہم نے اس لئے پی لیا کہ ڈاکٹرز اتحاد پارہ پارہ نہ ہو۔ دوسری اتحادی جماعتوں نے بھی ایک ایک رکن نامزد کرنے پر اکتفا کیا اور یوں کابینہ میں سات نشستیں ہمارے حصے میں آئیں۔

آج انتخابات بہت پر امن ماحول میں ہوئے اور چھے بجے کے آس پاس جب ووٹوں کی گنتی ختم ہوئی تو لوگوں کو علم ہوا کہ ہم نے ۴۰۳ ووٹ حاصل کئے اور ڈیموکریٹس نے صرف ۲۶۹ ووٹ۔ یوں اگلے دو سال تک ہم نے پراونشل ڈاکٹرز ایسوسی ایشن کی نمائندگی حاصل کرنے کا حق لے لیا۔

کچھ زیادہ لمے  چوڑے وعدے نہیںکئے ہم نے۔ صرف اپنی گزشتہ کارکردگی ووٹران کے سامنے رکھی اور ان کا اعتماد حاصل کر لیا۔ اللہ سے دعا ہے کہ وہ اگلے دو سال ہمیں اپنا فرض ادا کرنے کی توفیق عطا کرے۔ اور ہمارا حامی و ناصر ہو۔ آمین۔